SACRA CONGREGATIO PRO ECCLESIA ORIENTALI.
DECRETUM.
Cum vigilantia pastoralis maxime conferat in bonum animarum et haec facilius exerceatur, si iurisdictio ecclesiastica alicuius dioecesis, quatenus possibile sit, intra fines civiles ditionis contineatur, SS.mus Dominus Noster Pius Div. Providentia PP. XI. in Audientia diei 7. Aprilis anno 1934 referente infrascripto Cardinali a Secretis Sacrae Congregationis pro Ecclesia Orientali, statuere dignatus est, ut paroecia Sanctae Barbarae ritus byzantini in urbe Vindobona e jurisdictione Archiepiscopi Leopoliensis Ruthenorum subtrahatur, eaque transeat in ditionem Archiepiscopi Vindobonensis. Attentis, nihilominus, peculiaribus rationibus, quibus supradicta paroecia inter alias ritus byzantini eminet et praefulget, Beatissimus Pater, memor etiam praeclarae historiae eiusdem paroeciae, cui Institutum “Barbareum” fuerat adnexum, in quo olim alebantur et in spem Ecclesiae succrescebant levitae ritus byzantini, decrevit eandem ab Archiepiscopo Vindobonensi tamquam Sanctae Sedis specialiter Delegato esse gubernandam. Vult insuper Beatissimus Pater ut, quoties eadem vacaverit paroecia, Archiepiscopus Leopoliensis Ruthenorum trium candidatorum nomina adferat, ex quibus Archiepiscopus Vindobonensis virum pietate ac doctrina excellentem eligat qui munere parochi fungatur quique jurisdictionem paroecialem habeat in omnes fideles ritus byzantini intra fines Reipublicae Austriacae commorantes.
Quae omnia, per praesens Decretum, publici iuris fiunt.
Contrariis quibuscumque minime obfuturis.
Datum Romae ex Aedibus Sacrae Congregationis pro Ecclesia Orientali die 20 Decembris anno 1935.
L.S.
+ A. Card. Sincero m. p.
Eppus Praenestin, a secretis.
J. Caesarini m. p., Adsessor.
(Publicado en: «Wiener Diözesanblatt», 28 de Abril de 1936, Año 74, Número 3-4 § I).